Фудбалерите на Волфсбург денеска ја освоија првата шампионска титула во германската Бундес лига, откако на домашен терен го совладаа Вердер од Бремен со убедливи 5:1. Екипата на Феликс Магат ја заврши сезоната со 69 бода, два повеќе од сега веќе вицешампионот Баерн од Минхен, кој сепак обезбеди пласман во Лигата на шампиони преку втората позиција. Покрај Магат, најзаслужни за успехот на Волфсбург се напаѓчите Џеко и Графите со вкупно постигнати 54 гола.

Горан Пандев потврди дека дефинитивно ќе го напушти Лацио. Од следната сезона  нашиот најдобар фудбалер ќе носи нов дрес. „Го напуштам Лацио. По пет години во Рим време е да го променам клубот. Потребен ми е нов предизвик, тоа е нормално за кариерата на секој фудбалер, изјави Пандев за Македонски Спорт. „Го сакам Лацио, но мислам дека ми треба поголем предизвик. Имав отворени разговори со претседателот Клаудио Лотито. Тој е свесен дека ова е најдобро решение.

Управниот одбор на Фудбалската Федерација на Македонија денеска на 33-тата седница, донесе одлука за именување на Мирсад Јонуз за селектор на сениорската фудбалска репрезентација на  Македонија. Претседателот на ФФМ, Харалампие Хаџиристески објави дека е постигнат договор со довчерашниот селектор на младата репрезентација, Мирсад Јонуз да го предводи сениорскиот тим до крајот на квалификацискиот циклус за Светското првенство.

Капитенот на Ливерпул, Стивен Џерард е прогласен за фудбалер на годината во Премиер лигата од асоцијацијата на спортски новинари. Џерард во изборот ги победи фудбалерите на Манчестер Јунајтед Рајан Гигс и Вејн Руни. Наградата на Здружението на спортски новинари е најстара од овој вид во Англија, се доделува уште од 1948 година, а Џерард е првиот фудбалер на Ливерпул, кој ја доби по Џон Барнс во 1990 година. Стивен Џерард престижната награда ќе ја прими на 29-ти мај на гала вечера во Лондон во хотелот Royal Lancaster.