Дека симнувањето песни од интернет е дело што се казнува на своја кожа најдобро го почувствувала Џејми Томас Расет. Сојузниот суд од Минесота ја прогласи 32-годишната Американка за виновна за илегално симнување музика од интернет. Џејми е казнета со 80.000 долари по песна, а бидејќи симнала 24 песни, вкупната казна изнесува близу 2 милиони долари. Ова е прв таков случај за кршење на авторски права во Америка, кој завршил на суд.

Репрезентацијата на Северна Кореја е последниот директен патник од азискиот континент на Светското првенство во Јужна Африка 2010. За фудбалерите на оваа држава ова ќе биде второ учество на фудбалските мундијали, откако првото учество го имаа 1966 година во Англија. Севернокорејците својот пласман го обезбедија откако го освоија второто место во Групата 2 во азиските квалификации.

Откако оствари рекорден трансфер во историјата на фудбалот, од околу 100 милиони евра Кристијано Роналдо најверојатно ќе собори уште еден светски рекорд. Португалецот во Реал ќе биде плаќан со рекордни 13 милиони евра годишно, тврди мадридскиот спортски весник „Marca“. Со таква плата Роналдо ќе застане на чело на листата на најдобро платени фудбалери во историјата на фудбалот. Досегашниот рекорд со 12 милиони евра годишно го држеше напаѓачот на Интер Златан Ибрахимовиќ.

Познатиот руски милијардер Роман Абрамович, за 340 милиони евра ја купи најскапата јахта во светот, пренесува германската телевизија Дојче Веле. За рускиот олигарх ова е само уште еден предмет со кој ќе се потенцира неговото огромно богатство. Eclipse е најголемата приватна јахта на светот, изработена во хамбуршкото бродоградилиште и ги има најновите технологии за заштита.